زوامل بين الشامتي الخليفي وبن غداوي الخليفي

زوامل بين الشامتي الخليفي وبن غداوي الخليفي

بن غداوي بن عبود الخليفي

مني سلام ألفين عالقيمه=واثنه على باحبل مردوفه
يالشامتي لا عد تكلمني =كلاً شفه يدرب بمدروفه
في البحر يالجار لاتبعد=القرش خادع لعن بوشوفه
بايقرشه من قد قرب منه=كمن عِسر قد راح في جوفه
قالوا لنا القرعه قده حاكم=محافظ على عربان مشعوفه
لكن بالصبر وبالدعاء=باقول يالله لاتقع لوفه
ياخوعوض خدمه لبا منك=عند المحافظ شوف معروفه
لاسرت وحدي ما قدرت أدخل=دونه عساكر صف مصفوفه

بن شامت القفيشي الخليفي

يا مرحبا حيا ملا الوادي=والزيد لا بغداد والكوفه
يأقوال شاعر يخلط المعنى=نفسه على لرزاق ملهوفه
يا ناصر انته من متى ريض=وتقول للعربان مشعوفه
مالك هدف واضح تمسك به =إلا لقافة ناس ملقوفه
اما المحافظ لا تبا عنده=جهز عزومه له ولضيوفه
أبشر به يا شيخ في دراك=لا قد خراف الدار محسوفه
لكن نصيحه شلها مني =قدها مع العراف معروفه
ياذي تبا مصروف من قرعه=قرعه يدور وين مصروفه

بن غدواي

دعوى كبيره ماشي أكبر منها=من ثقلها المركب وقف ما عد يسير
دعوى على مخلوق أعزه وأرحمه=شفني صبيرك يوم ما حد لك صبير
شغال سبع أشهر رواتبها معه=بالله يا جلعوم راجع لي المدير
عني وبا ورد شهودي أعشره=أنه استلمها كامله إمن الوزير
وإلا يقول منكر وشوني بتبعه=لا عند حاكم يصدر أحكامه بصير
واليوم عند الله وعندك يا حكيم= شوف السيل لاكن يقع بعده غدير

جواب بن شامت

حيا وسهلا بالقوافي كلها =ترتيبها جيد ومعناها خطير
متضمنه دعوى وتهمه باطله=لفقتها يا صاحب العقل النوير
إن كان هي منك كبيره ظالمه=ما بعذرك باحكم في هذه كبير
أما هروج الشارع أوبه منها = ماشي لها مسقى ولا مقراء غزير
حبي منقى ما يجي فيه الدبش=ما هو بشي خرمان ولاشي حوير
ما تدري إني في علو القائمه=ذي راسها العملاق في رتبة مشير